महादरबार न्यूज नेटवर्क - विलास गुरव
चिपळूण तालुक्यातील पिंपळी येथील जुना पूल खचल्यानंतर खडपोली गावासह औद्योगिक वसाहत व दसपटीकडे जाण्यासाठी पेढांबे- खडपोली असा वळसा मारून जावे लागत असल्याने अवजड वाहतूक सुरळीत होण्याबरोबरच आवश्यक असलेले रुंदीकरण, मजबुतीकरण व डांबरीकरण कामांसाठी सादर करण्यात आलेल्या प्रस्तावास तातडीने मंजुरी द्यावी, अशी मागणी आमदार शेखर निकम यांनी राज्याचे सार्वजनिक बांधकाम मंत्री मा ना श्री शिवेंद्रसिंहराजे भोसले तसेच यांच्याकडे निवेदनाद्वारे केली आहे.
यानुसार पिंपळी- नांदिवसे येथील पूल नुकताच खचल्यामुळे पुलावरील सर्व वाहतूक बंद करण्यात आलेली आहे. परिणामी परिसरातील वाहतुकीवर मोठा परिणाम झाला असून जड वाहनांची वाहतूक पूर्णतः ठप्प झाली आहे. सद्यस्थितीत हलकी वाहनांची वाहतूक पिंपळी नाका ते पेढांबे नाका ते खडपोली तळेवाडी ते खडपोली, कळंबस्ते ते मोरवणे फाटा, मोरवणे फाटा ते दळवटणे मार्ग वालोटी ते वालोटी फाटा अशी वळविण्यात आली आहे.
दोन्ही पर्यायी मार्ग डांबरी असून त्यांची सरासरी रुंदी केवळ ३.७५ मीटर आहे. तसेच, काही ठिकाणी तीव्र वळणं असल्यामुळे या मार्गावरून अवजड वाहतुकीस अडचणी निर्माण होत आहेत. परिणामी औद्योगिक वसाहतीकडील जड वाहतूक पूर्णतः ठप्प झाली आहे. तरी तातडीने मार्ग काढण्यासाठी, या दोन्ही पर्यायी मार्गांचे रुंदीकरण, मजबुतीकरण व डांबरीकरण करणे आवश्यक आहे. यासदंर्भात प्रस्ताव शासनाकडे सादर करण्यात आला आहे. तरी निकड लक्षात घेता खास बाब म्हणून या प्रस्तावास तातडीने मंजूरी मिळावी, अशी मागणी या निवेदनाद्वारे करण्यात आली आहे.
0 Comments