#Pune फुरसुंगी येथे “नमो युवा रन मॅरेथॉन” उत्साहात संपन्न – पंतप्रधान नरेंद्र मोदी यांच्या वाढदिवसानिमित्त आयोजित उपक्रमास उत्स्फूर्त प्रतिसाद

महादरबार न्यूज नेटवर्क - 
भारतीय जनता युवा मोर्चा पुणे जिल्ह्याच्या वतीने देशाचे यशस्वी पंतप्रधान मा. श्री. नरेंद्र मोदी यांच्या वाढदिवसानिमित्त भव्य “नमो युवा रन मॅरेथॉन” चे आयोजन करण्यात आले. या उपक्रमास विविध स्तरातील नागरिक, युवक-युवती आणि समाजप्रेमी मंडळींनी उत्स्फूर्त सहभाग नोंदवला.

ही मॅरेथॉन केवळ धावण्यापुरती मर्यादित नसून, देशहिताचे महत्त्वाचे संदेश घेऊन आली होती. “ऑपरेशन सिंदूर”, “आत्मनिर्भर भारत”, “नशा मुक्त भारत”, “हिट इंडिया - फिट इंडिया” यांसारख्या राष्ट्रीय स्तरावरील अभियानांना पाठिंबा दर्शविणाऱ्या घोषणांनी संपूर्ण परिसर दुमदुमून गेला. या उपक्रमाच्या माध्यमातून युवकांमध्ये देशभक्ती, सामाजिक बांधिलकी व आरोग्याविषयी जागरूकता निर्माण करण्यात आली.

कार्यक्रमाला अनेक मान्यवरांनी उपस्थित राहून आपला मोलाचा सहभाग नोंदवला. यामध्ये प्रमुख पाहुणे भाजपाचे जिल्हाध्यक्ष मा.शेखर वडणे, माजी आमदार मा.संजय जगताप,भा.ज.पा. प्रदेश सचिव मा.नवनाथ पडळकर,युवा मोर्चा जिल्हाध्यक्ष वैभव सोलनकर, ज्येष्ठ नेते पंडितदादा मोडक,बाबाराजे जाधवराव, संजय हरपळे,बाळासाहेब गरुड, संदीप बापू हरपळे, स्वप्नील मोडक,धनंजय कामठे,युवा मोर्चा मंडल अध्यक्ष हर्षवर्धन हरपळे, तसेच सौरभ हरपळे,सचिन काळे, राहुल हरपळे,वैभव भाडळे,आकाश हरपळे,इशान हरपळे,सचिन काळे आणि अनेक मान्यवर कार्यकर्ते उपस्थित होते.

या कार्यक्रमाचे आयोजन प्रभावीपणे व शिस्तबद्ध पद्धतीने पार पडले. धावपटूंनी देशभक्तिपर बॅनर्स, पोस्टर्स आणि घोषणांसह मॅरेथॉन पूर्ण करताना उपस्थितांचे लक्ष वेधून घेतले. युवकांमध्ये जोम, जोश आणि देशप्रेमाची भावना जागृत झाली होती.

या उपक्रमाचे विशेष आकर्षण म्हणजे समाजातील विविध स्तरांतील तरुणांचा सहभाग, ज्यात विद्यार्थ्यांपासून ते सामाजिक कार्यकर्त्यांपर्यंत अनेकांनी सामील होत “सशक्त भारत” या संकल्पनेला पाठिंबा दिला. उपस्थित मान्यवरांनी आपल्या भाषणातून पंतप्रधान नरेंद्र मोदी यांच्या नेतृत्वाखाली चालू असलेल्या सामाजिक, आर्थिक व आरोग्यविषयक धोरणांचे महत्त्व अधोरेखित केले आणि युवकांनी देशाच्या प्रगतीसाठी अधिक सक्रीय भूमिका बजवावी असे आवाहन केले.

कार्यक्रमाचे यशस्वी आयोजन भारतीय जनता युवा मोर्चा, फुरसुंगी यांच्या वतीने करण्यात आले. मॅरेथॉननंतर सहभागी धावपटूंना प्रमाणपत्र देण्यात आले आणि एक सामाजिक संदेश घेऊन कार्यक्रमाची सांगता करण्यात आली.

कार्यक्रमाचे मुख्य उद्दिष्ट:
• युवकांमध्ये राष्ट्रीय अभियानांविषयी जनजागृती
• आरोग्य, फिटनेस आणि सामाजिक बांधिलकी याचे महत्त्व अधोरेखित करणे
• पंतप्रधान नरेंद्र मोदी यांच्या कार्याची प्रेरणा घेऊन समाजसेवा

प्रमुख स्लोगन्स:
• ऑपरेशन सिंदूर: “वीर पत्नींच्या सन्मानासाठी…”
• आत्मनिर्भर भारत: “स्वावलंबन हीच खरी शक्ती”
• नशा मुक्त भारत: “युवकांना नशेमुक्त करून उज्वल भविष्य घडवा”
• हिट इंडिया - फिट इंडिया: “तंदुरुस्त भारत, समर्थ भारत”