#Madha विकसित कृषी संकल्प अभियान अंतर्गतभरडधान्याचे क्षेत्र वाढण्यासाठी राळा पिकाच्या विकसित वाणांच्या बियाण्याचे वितरण

महादरबार न्यूज नेटवर्क -
आधुनिक कृषि तंत्रज्ञान आणि खरीप हंगाम पूर्व नियजण प्रसारासाठी विकसित कृषी संकल्प अभियान दि. २९ मे ते १२ जून २०२५ या दरम्यान सोलापूर जिल्ह्यातील सर्व तालुक्यांमध्ये पोहोचवण्याचे काम महात्मा फुले कृषि विद्यापीठ राहुरी अंतर्गत कृषी विज्ञान केंद्र मोहोळ, कृषी विभाग, महाराष्ट्र शासन आणि राष्ट्रीय डाळिंब संशोधन केंद्र सोलापूर, राष्ट्रीय भरड धान्य संशोधन संस्था, सोलापूर यांच्यामार्फत केले जात आहे.

आज दि.०९ जून २५ रोजी माढा तालुक्यातील चिंचोली येथे कार्यक्रमाचे आयोजन करण्यात आले.

सोलापूर येथील भारतीय भरडधान्य संशोधन केंद्र येथील शास्त्रज्ञ डॉ. परशुराम पत्रोटी यांनी मानवी आहारातील भरडधान्याचे महत्त्व विशद केले तसेच उपस्थित शेतकऱ्यांना त्यांच्याच केंद्रात विकसित केलेले राळ्याचे विकसित वाण CFXMV2 या भरडधान्याचे मोफत बियाणे वितरित केले.

डॉ. शिल्पा परशुराम यांनी डाळिंब पिकातील तेल्या रोग व डाळिंबामध्ये येणारा मर रोग याबद्दल शेतकऱ्यांनी कोणती काळजी घ्यावी आणि त्यासाठी वापरण्यात येणाऱ्या सर्व प्रतिबंधात्मक उपाय याविषयी तसेच राष्ट्रीय डाळिंब संशोधन केंद्राच्या शिफारशींबाबत सखोल मार्गदर्शन केले. अन्नशास्त्र व तंत्रज्ञान विषयाचे विषय विशेषज्ञ श्री. दिनेश क्षिरसागर यांनी कृषि मालाचे मूल्यवर्धन, दुग्ध प्रक्रिया, फळे व भाजीपाला प्रक्रिया उद्योग, कडधान्य प्रक्रिया, सेंद्रिय शेती प्रमाणीककरण आणि प्रधानमंत्री सुक्ष्म अन्नप्रक्रिया उद्योग योजना याविषयी सविस्तर माहिती दिली. पीक संरक्षण विषयाचे विषय विशेषज्ञ डॉ. पंकज मडावी यांनी बीज प्रक्रिया, खरीप हंगामातील कीड व रोग व्यवस्थापन, AI आधारित फेरोमॅन ट्रॅप्स,अशा विविध नवीन तंत्रज्ञानाबद्दल शेतकऱ्यांमध्ये जनजागृती करण्यात आली. नॅनो युरिया आणि नॅनो डीएपी आणि माती व पाणी परीक्षण आधारित खत व्यवस्थापन याबद्दल उपस्थित शेतकऱ्यांना मृद विज्ञान व कृषि रसायन शास्त्रं विषयाचे विषय विशेषज्ञ श्रीमती काजल जाधव म्हात्रे यांनी माहिती दिली. कृषि अधिकारी श्रीमती गायत्री चव्हाण यांनी कृषि विभागाच्या विविध योजना विषयी सविस्तर माहिती दिली. इफ्को सोलापूर चे आकाश पाटील यांनी ड्रोन फवारणी तंत्रज्ञान व त्याचे फायदे नमूद केले.

याप्रसंगी चिंचोली चे सरपंच श्री संतोष लोंढे , उप कृषि अधिकारी दादा पवार, सहायक कृषि अधीकारी श्री. शांताराम इंगळे हे उपस्थित होते. सदर कार्यक्रमाच्या यशस्वीतेसाठी श्री सुयोग ठाकरे, कृषि मित्र व ग्रामस्थ आदींचे सहकार्य लाभले.